త్వరలో పురుషులకు ప్రత్యేక డ్వాక్రా గ్రూపులు :ముఖ్యమంత్రి చంద్రబాబు నాయుడు :

నారద వర్తమాన సమాచారం

త్వరలో పురుషులకు ప్రత్యేక డ్వాక్రా గ్రూపులు :ముఖ్యమంత్రి చంద్రబాబు నాయుడు :

అమరావతి:-

గ్రామాల్లో పది, పదిహేను మంది మహిళలతో ఏర్పాటు చేసే డ్వాక్రా గ్రూపుల గురించి ప్రత్యేకంగా చెప్పాల్సిన పని లేదు. మహిళల ఆర్థిక స్వావలంబన కోసం రూపొందించిన ఈ కార్యక్రమం మూడు దశాబ్దాలుగా విజయవంతంగా అమలవుతోంది.ఇదే తరహాలో పురుషులకు సైతం గ్రూపులు ఉంటే ఎలా ఉంటుందని ఆలోచించారు.. ఏపీ సీఎం చంద్రబాబు. ఆయన సూచనలతోనే త్వరలోనే పురుషులకు ప్రత్యేక డ్వాక్రా గ్రూప్ లను ఏర్పాటు చేయనున్నారు.ఇటీవల కలెక్టర్లతో సమావేశం సందర్భంగా రుణ యాప్ ల విషయం చర్చకు వచ్చింది. అత్యవసరాలు, ఇతర చిన్న మొత్తాలకు పురుషులు తీవ్ర ఇబ్బందులు పడుతున్నట్లు అధికారులు సీఎం దృష్టికి తీసుకువచ్చారు. దాంతో.. అధిక వడ్డీలకు డబ్బులు తీసుకోవడం, రుణ యాప్ ల ఉచ్చులో చిక్కుకుని తీవ్రంగా నష్టపోతున్నారని తెలిపారు. దీంతో.. వినూత్నంగా ఆలోచించిన సీఎం చంద్రబాబు.. డ్వాక్రా గ్రూప్ ల తరహాలోనే పురుషుల కోసం రుణాలు అందించే సంఘాలను ఏర్పాటు చేస్తే ఎలా ఉంటుందన్నారు.సీఎం ఆదేశాలతో అధికారులు ప్రయోగాత్మకంగా పురుషులకు సంఘాల ద్వారా రుణాలు ఇప్పించేందుకు కసరత్తు ప్రారంభించారు. ఇందులో భాగంగా.. అనకాపల్లి
జిల్లాలో ప్రయోగాత్మకంగా 20 గ్రూపులను ఏర్పాటు చేసిన అధికారులు.. ఆసక్తి ఉన్న వారిని సభ్యులుగా చేర్చి.. రుణాలు ఇప్పించారు.

బ్యాంకుల్లో రుణాలకు తలకు మించిన నిబంధలు ఉంటుండడం, రోజులు తరబడి తిరగాల్సి రావడంతో… చిరు వ్యాపారులు, చిన్న ఉద్యోగులకు డబ్బులు లభించడం ఇబ్బందిగా ఉంటుంది. ఇలాంటి వాళ్లుక ఈ గ్రూప్ లు ఆర్థికంగా అండగా నిలుస్తాయని భావిస్తున్నారు. పురుషులతో ఏర్పాటు చేయనున్న గ్రూప్ లను కామన్ ఇంట్రెస్టు గ్రూపుగా పిలవనున్నారు. ఇందులో.. చిన్నచిన్న ఉద్యోగులు, వివిధ రంగాలకు చెందిన కార్మికులకు చోటు కల్పించనున్నారు. అంటే.. భవన నిర్మాణ కార్మికులు, ఆటో డ్రైవర్లు, లారీ డ్రైవర్లు, రిక్షా డ్రైవర్లు, వాచ్ మెన్లు.. ఇలా వివిధ రంగాలకు చెందిన వారిని సభ్యులుగా చేర్చనున్నారు. 18 ఏళ్ల నుంచి 60 ఏళ్ల మధ్యనున్న వారిని ఓ సంఘంగా ఏర్పాటు చేసి.. వీరికి బ్యాంకు రుణాలు ఇప్పించనున్నారు. వీటిని వాయిదాల పద్దతిలో.. నెల వారీ చెల్లింపులు చేయాల్సి ఉంటుంది.