డ్వాక్రా మహిళలకు శుభవార్త

నారద వర్తమాన సమాచారం

డ్వాక్రా మహిళలకు శుభవార్త

▪️ పిల్లల చదువులు, పెళ్లికి 5% వడ్డీతో రూ.లక్ష రుణం
▪️ మహిళా దినోత్సవం రోజున ప్రారంభం!

డ్వాక్రా మహిళలకు కూటమి ప్రభుత్వం త్వరలో కొత్త పథకాన్ని అమల్లోకి తీసుకురానుంది. వారి పిల్లల చదువులు, వివాహ అవసరాలకు 5 శాతం వడ్డీతోనే రూ. లక్ష వరకు రుణాన్ని అందించనుంది. చాలామంది పేదలు వారి బిడ్డల చదువులు, వివాహాలకు బయట ఎక్కువ వడ్డీలకు అప్పులు తెచ్చి అవస్థలు పడుతున్నారని గుర్తించిన ప్రభుత్వం.. వారికి ఆర్థిక భరోసానివ్వాలని నిర్ణయించింది. ఈ పథకం మార్గదర్శకాలపై అధికారులు కసరత్తు ప్రారంభించగా, సీఎంవో ఆమోదం తెలిపింది. మార్చి 8న మహిళా దినో త్సవం రోజున లేదా మరో తేదీన సీఎం చేతులు మీదుగా ఈ పథకాన్ని ప్రారంభించాలని యోచిస్తున్నారు.

స్త్రీనిధి ద్వారా అమలు

ఈ పథకాన్ని గ్రామీణ పేదరిక నిర్మూలన సొసైటీ (సెర్ప్) పరిధిలోని స్త్రీనిధి సంస్థ ద్వారా అమలు చేయనున్నారు. రాష్ట్రవ్యాప్తంగా గ్రామీణ, పట్టణ ప్రాంతాల్లో కోటి మందికి పైగా డ్వాక్రా మహిళలున్నారు. ఈ పథకానికి ఏటా రూ.1,000 కోట్లు కేటాయించనున్నారు. అంటే రానున్న నాలుగేళ్లలో రూ.4 వేల కోట్ల రుణాలిచ్చేలా ప్రణాళిక రచించారు. నిధుల సమీకరణపై సెర్చ్ అధికారులు కసరత్తు చేశారు.