సెక్స్ వర్కర్ల జీవితాలపై సుప్రీంకోర్టు చారిత్రాత్మక తీర్పు!

నారద వర్తమాన సమాచారం

సెక్స్ వర్కర్ల జీవితాలపై సుప్రీంకోర్టు చారిత్రాత్మక తీర్పు!*

ఒక అమ్మాయిని ఉద్యోగం ఇప్పిస్తామని నమ్మించి, మోసం చేసి నగరానికి తీసుకువచ్చారు. చేతిలో రూపాయి లేదు.. చుట్టూ ఉన్నది అపరిచితుల ప్రపంచం. ఆ నిస్సహాయతను ఆసరాగా చేసుకుని ఆమె శరీరాన్నే ఒక సరుకుగా మార్చేసింది ఒక ముఠా.

ఇది బలవంతపు నరకం! మరోవైపు.. ఇంకొక మహిళ ఉంది. ఆమె కూడా అదే వృత్తిలో ఉంది.

కానీ ఆమెను ఎవరూ కిడ్నాప్ చేయలేదు, ఎవరూ అమ్మలేదు. కుటుంబ అవసరాల కోసమో, వ్యక్తిగత కారణాల వల్లో ఆమె స్వచ్ఛందంగా ఆ వృత్తిని ఎంచుకుంది. ఈ ఇద్దరినీ సమాజం ఒకే కంటితో చూస్తుంది.. చట్టం ఒకే లాఠీతో కొడుతుంది. కానీ, “బాధితురాలైన అభాగ్యురాలిని, స్వేచ్ఛగా నిర్ణయం తీసుకున్న వయోజనురాలిని ఒకే త్రాసులో ఎలా తూస్తారు?” అనే ఒక గంభీరమైన ప్రశ్న ఇప్పుడు దేశ అత్యున్నత న్యాయస్థానం ముందు నిలిచింది. దీనిపై స్పందించిన సుప్రీంకోర్టు, సమాజపు మూసధోరణులను బద్దలు కొడుతూ అత్యంత మానవీయమైన, చారిత్రాత్మకమైన తీర్పును వెలువరించింది.

ఇది చట్టబద్ధత కాదు.. దోపిడీపై ఉక్కుపాదం!

మొదటగా ఒక విషయం స్పష్టంగా అర్థం చేసుకోవాలి. సుప్రీంకోర్టు ఇచ్చిన ఈ తీర్పు వ్యభిచారాన్ని చట్టబద్ధం చేయలేదు, అలాగే ఆ వృత్తిని ప్రోత్సహించనూ లేదు. ఈ తీర్పు యొక్క పరమార్థం.. మానవ అక్రమ రవాణా (హ్యూమన్ ట్రాఫికింగ్) కోరల్లో చిక్కుకున్న అమాయకులను రక్షించడం మరియు స్వచ్ఛందంగా వృత్తిలో ఉన్నవారి హక్కులను కాపాడటం. రాజ్యాంగంలోని ఆర్టికల్ 23 ప్రకారం మనుషుల అక్రమ రవాణా దేశంలో తీవ్రమైన నేరం.

1956 నాటి ఇమ్మోరల్‌ ట్రాఫిక్‌ ప్రివెన్షన్ యాక్ట్ (ITPA) లక్ష్యం కూడా వృత్తిలో ఉన్న మహిళలను వేధించడం కాదు.. వారి వెనుక ఉండి నరకం చూపిస్తున్న దళారులు, బ్రోతల్ నిర్వాహకులను ఏరిపారేయడం. కానీ క్షేత్రస్థాయిలో రెస్క్యూ ఆపరేషన్ల పేరుతో పోలీసులు అందరినీ ఒకేలా అదుపులోకి తీసుకోవడం, పునరావాసం పేరుతో ఆశ్రయ కేంద్రాల్లో బంధించడం లాంటి అన్యాయాలు జరుగుతున్నాయని కోర్టు ఆవేదన వ్యక్తం చేసింది. ఇకపై అలాంటి వేధింపులు సాగవని ఖాకీ నెత్తిన కోర్టు కఠిన ఆదేశాల లాఠీని ఝులిపించింది.

ఐక్యరాజ్యసమితి ప్రమాణాలు.. ఖాకీలకు, మీడియాకు లక్ష్మణ రేఖ!

ట్రాఫికింగ్ అంటే ఒక వ్యక్తి బలహీనతను ఆసరాగా చేసుకుని మోసంతో, బెదిరింపులతో దోపిడీ చేయడం అని ఐక్యరాజ్యసమితి ‘పలెర్మో ప్రొటొకాల్’ స్పష్టం చేస్తోంది. ఒకసారి బలవంతం జరిగిందని తేలితే, అక్కడ సదరు మహిళ సమ్మతికి విలువ ఉండదు. కానీ ఎలాంటి ఒత్తిడి లేకుండా ఒక అడల్ట్ (వయోజనురాలు) స్వయంగా నిర్ణయం తీసుకుంటే ఆ హక్కును గౌరవించాలని సుప్రీంకోర్టు తేల్చిచెప్పింది.

మైనర్ బాలిక అత్యాచారం కేసులో చారిత్రాత్మక తీర్పు.. ‘డబుల్ డెత్ సెంటెన్స్’ !!

ఇకపై పోలీసులు దాడులు చేసేటప్పుడు.. సదరు వ్యక్తి నిజంగా ట్రాఫికింగ్ బాధితురాలా లేక స్వచ్ఛందంగా ఉందా? అనేది ముందుగా నిర్ధారించుకోవాలి. ఇష్టపూర్వకంగా వృత్తిలో ఉన్నవారిపై అనవసర కేసులు పెట్టడం, వేధించడం చట్టవిరుద్ధమని కోర్టు హెచ్చరించింది. అలాగే, రెస్క్యూ ఆపరేషన్ల సమయంలో సెక్స్ వర్కర్ల ఫోటోలు, వీడియోలను టీవీల్లో చూపిస్తూ వారి గుర్తింపును రచ్చకీడ్చే మీడియా అతిపై కోర్టు తీవ్ర ఆగ్రహం వ్యక్తం చేసింది. అలా గుర్తింపును వెల్లడించడం తీవ్రమైన నేరంగా పరిగణిస్తామని హెచ్చరించింది.

బిడ్డను వేరు చేయలేరు.. ఆధార్‌తో సామాజిక భద్రత!

ఈ దేశంలో పుట్టిన ప్రతి ఒక్కరికీ, వృత్తి ఏదైనా సరే.. రాజ్యాంగంలోని ఆర్టికల్ 21 ప్రకారం గౌరవంగా జీవించే హక్కు ఉందని న్యాయస్థానం గంభీరంగా ప్రకటించింది. “కేవలం ఒక మహిళ లైంగిక వృత్తిలో ఉందనే ఏకైక కారణంతో, ఏ తల్లి నుంచైనా ఆమె కడుపున పుట్టిన బిడ్డను బలవంతంగా వేరు చేసే హక్కు ఏ అధికారికీ లేదు” అంటూ కోర్టు ఇచ్చిన తీర్పు సభ్య సమాజాన్ని ఆలోచింపజేసేలా ఉంది.

36 ఏళ్ల తర్వాత తీర్పు! తండ్రి ఆస్తిలో కూతురుకు సమాన హక్కు

అంతేకాకుండా, సమాజంలో అట్టడుగున ఉన్న వీరికి చట్టపరమైన గుర్తింపునిచ్చేందుకు సుప్రీంకోర్టు ఒక విప్లవాత్మక నిర్ణయం తీసుకుంది. ఎలాంటి అడ్రస్ ప్రూఫ్ లేకపోయినప్పటికీ, సెక్స్ వర్కర్లందరికీ తక్షణమే ‘ఆధార్ కార్డులు’ జారీ చేయాలని యునిక్ ఐడెంటిఫికేషన్ అథారిటీ ఆఫ్ ఇండియా (UIDAI)ను ఆదేశించింది. దీనివల్ల వారికి సమాజంలో గుర్తింపు దక్కడంతో పాటు రేషన్, వైద్యం, ప్రభుత్వ సంక్షేమ పథకాలు పొందే హక్కు లభిస్తుందని కోర్టు ఆశాభావం వ్యక్తం చేసింది.

ప్రతి సెక్స్ వర్కర్ ట్రాఫికింగ్ బాధితురాలు కాదు.. అలాగే ప్రతి ట్రాఫికింగ్ బాధితురాలిని కేవలం సెక్స్ వర్కర్‌గా ముద్ర వేయలేం. ఒకరికి ముఠాల నుండి విముక్తి, తక్షణ వైద్యం, ఉపాధి శిక్షణతో కూడిన ‘రక్షణ’ కావాలి.. మరొకరికి చట్టసమ్మతమైన ‘గౌరవం, వ్యక్తిగత స్వేచ్ఛ’ కావాలి. ఈ రెండింటి మధ్య ఉన్న నూలుపోగు లాంటి తేడాను గుర్తించి న్యాయం చేయడమే ఒక ఆధునిక ప్రజాస్వామ్య దేశంగా మన అందరి బాధ్యత అని సుప్రీంకోర్టు ఈ తీర్పు ద్వారా దేశానికి గుర్తుచేసింది.