అమిత్ షా వర్సెస్ కేజ్రీవాల్.. సోషల్ మీడియాలో మాటల యుద్ధం

నారద వర్తమాన సమాచారం

అమిత్ షా వర్సెస్ కేజ్రీవాల్.. సోషల్ మీడియాలో మాటల యుద్ధం

కేంద్ర హోంమంత్రి అమిత్ షాకు కేజ్రీవాల్ కౌంటర్

అవినీతిపరులకు పదవులిచ్చే నేతలు కూడా రాజీనామా చేయాలని డిమాండ్

తప్పుడు కేసులతో జైలుకు పంపితే బాధ్యులెవరని ప్రశ్న

రాజకీయ కుట్రతోనే తనను జైల్లో పెట్టారని ఆరోపణ

160 రోజులు జైలు నుంచే ప్రభుత్వాన్ని నడిపానని వెల్లడి

జైల్లో ఉన్నవారు పదవుల్లో ఉండొద్దన్న షా వ్యాఖ్యలపై వివాదం

అవినీతి ఆరోపణలు ఎదుర్కొంటున్న వారిని పార్టీలలో చేర్చుకుని, వారికి మంత్రి పదవులు కట్టబెట్టే నాయకులు కూడా తమ పదవులకు రాజీనామా చేయాలి కదా? అని ఆమ్ ఆద్మీ పార్టీ అధినేత, ఢిల్లీ మాజీ ముఖ్యమంత్రి అరవింద్ కేజ్రీవాల్ కేంద్ర హోంమంత్రి అమిత్ షాను సూటిగా ప్రశ్నించారు.

జైలు నుంచి పాలన సాగించడంపై అమిత్ షా కార్యాలయం చేసిన ఒక సోషల్ మీడియా పోస్టుపై కేజ్రీవాల్ సోమవారం తీవ్రంగా స్పందించారు.
30 రోజులకు మించి జైలులో ఉన్నవారు ప్రధాని, ముఖ్యమంత్రి, మంత్రుల వంటి పదవులలో కొనసాగకుండా నిషేధం విధించే బిల్లుల గురించి అమిత్ షా తన పోస్టులో ప్రస్తావించారు. అవినీతి, క్రిమినల్ కేసుల్లో నిందితులుగా ఉన్నవారు జైలు నుంచే ప్రభుత్వాన్ని నడుపుతారా? అని ఆయన ప్రశ్నించారు. ఈ వ్యాఖ్యలకు కేజ్రీవాల్ గట్టిగా బదులిచ్చారు.

“తీవ్రమైన నేరారోపణలు ఉన్నవారిని పార్టీలో చేర్చుకుంటున్నారు. వారిపై ఉన్న కేసులను ఎత్తివేసి మంత్రులుగా, ముఖ్యమంత్రులుగా చేస్తున్నారు. అలాంటి వారు కూడా తమ పదవులకు రాజీనామా చేయాలి కదా?” అని కేజ్రీవాల్ నిలదీశారు. అంతేకాకుండా “ఒకవేళ ఎవరినైనా తప్పుడు ఆరోపణలతో జైలుకు పంపి, ఆ తర్వాత వారు నిర్దోషి అని తేలితే పరిస్థితి ఏంటి? అలా తప్పుడు కేసు పెట్టిన మంత్రికి ఎలాంటి శిక్ష విధించాలి?” అని ఆయన పలు ప్రశ్నలు సంధించారు.

కేంద్ర ప్రభుత్వం తనపై రాజకీయ కుట్ర చేసిందని, తప్పుడు కేసులతో జైలుకు పంపిందని కేజ్రీవాల్ ఆరోపించారు. “నేను 160 రోజుల పాటు జైలు నుంచే ప్రభుత్వాన్ని నడిపాను. ఆ సమయంలో కూడా ఢిల్లీ ప్రజలకు ఎలాంటి ఇబ్బంది కలగకుండా చూసుకున్నాను” అని ఆయన గుర్తుచేశారు. ఈ తాజా మాటల యుద్ధంతో కేంద్ర ప్రభుత్వానికి, ఆమ్ ఆద్మీ పార్టీకి మధ్య రాజకీయ విభేదాలు మరోసారి బయటపడ్డాయి.