యువనేత లోకేష్‌ను కలిసి అభినందనలు తెలిపిన ప్రత్తిపాటి

నారద వర్తమాన సమాచారం

జూన్ :05

కూటమి బాధ్యత మరింత పెంచిన చారిత్రక విజయం: ప్రత్తిపాటి

యువనేత లోకేష్‌ను కలిసి అభినందనలు తెలిపిన ప్రత్తిపాటి

అధికార వైకాపాను చెల్లాచెదురు చేసిన చారిత్రక విజయం కూటమి బాధ్యతను మరింత పెంచింది అన్నారు మాజీమంత్రి, చిలకలూరిపేట విజేత ప్రత్తిపాటి పుల్లారావు. ఒక్కసారి అధికారం ఇచ్చాక ఏం చేసినా సహిస్తారు, భరిస్తారు అనే తరహాలో వ్యవహరించడంతోనే వైకాపాను కిలోమీటర్ల లోతున భూమిలో పాతిపెట్టేశారని చురకలు వేశారాయన. ఈ నేపథ్యంలోనే నవ్యాంధ్రప్రదేశ్ నిర్మాణం కోసం సునామీ లాంటి తీర్పునిచ్చిన ప్రజాభిప్రాయాన్ని గౌరవిస్తూ మొదటి రోజు నుంచే వారికి సేవకులమే అనే బాధ్యతతో ఉంటామని ప్రత్తిపాటి తెలిపారు. ఈ రోజు నుంచే అందరం బాధ్యతగా కష్టపడదామని లోకేష్‌ కూడా సూచించారన్నారు. కూటమి ఘనవిజయాన్ని పురస్కరించుకుని బుధవారం తెలుగుదేశం పార్టీ జాతీయ ప్రధాన కార్యదర్శి, మంగళగిరి కూటమి అభ్యర్థి నారా లోకేష్‌ను ఉండవల్లిలోని నివాసంలో ప్రత్తిపాటి పుల్లారావు మర్యాదపూర్వకంగా కలిశారు. అసెంబ్లీ ఎన్నికల్లో మంగళగిరి నుంచి 91 వేలకుపైగా ఓట్లతో విజయం సాధించిన లోకేష్‌కు శుభాకాంక్షలు తెలిపారు. లోకేష్‌ను శేషవస్త్రంతో సత్కరించి పుష్పగుచ్చం అందించారు. ఈ సందర్భంగానే చిలకలూరిపేట నుంచి 33,262 ఓట్ల ఆధిక్యంతో ఎమ్మెల్యేగా గెలిచిన ప్రత్తిపాటిని లోకేష్‌ అభినందించారు. అహంకారానికి మూల్యంగానే వైకాపాను ప్రజలు 151 నుంచి 11కి పడేశారని అది అంతా గుర్తుంచుకుని ముందుకెళ్దామని లోకేష్ సూచించారు. చరిత్ర ఎరగని విజయంతో ప్రజలు పెట్టుకున్న నమ్మకాన్ని , రాష్ట్ర పునర్నిర్మాణ బాధ్యతను పూర్తి చేద్దామన్నారు. యువగళం పాదయాత్రలో ఇచ్చిన ప్రతి హామీని నెరవేర్చాల్సిన బాధ్యత కూడా తమపైన ఉందని, ఆ దిశగా అందరం కలసికట్టుగా పనిచేద్దామని పిలుపునిచ్చారు.